30/08/2021
O Concello conxela os impostos no 2022: "Temos que consolidar a recuperación"
O goberno de Vigo non aplicará o IPC
A mesma medida xa se tomara para este 2021, co que será o segundo exercicio fiscal consecutivo sen aplicar o Índice de Prezos ao Consumo (IPC).
“A norma é incrementar os impostos igual que os prezos, pero eu non quero facelo, quero facerlle un xesto á difícil situación económica dos cidadáns de Vigo e por iso o incremento nominal será cero” en 2022, explicou o rexedor. A decisión representa deixar de ingresar catro millóns de euros (un incremento do IPC do 3,5%) que, desta forma, quedarán “nos petos dos vigueses”.
Ademais, Caballero subliñou que o Concello que preside mantén a “taxa cero” para terrazas e incorpora como novidade a exención do pago das taxas municipais de obras de adaptación da vivenda a aquelas familias con baixos ingresos, preto de catro mil que tamén están libres de abonar o lixo tamén por criterios de renda.
En 2022, o goberno de Vigo aplicará exencións e bonificacións fiscais por valor total de 17 millóns de euros. Detallou Caballero que, deste total, 8,5 millóns corresponden aos impostos: cinco millóns de euros en concepto de IBI, dous millóns en vehículos, 1,1 millóns en plusvalía, 215.000 euros do IAE e 235.000 euros do ICIO. Os outros 8,5 millóns proceden das taxas e prezos públicos que o Concello non cobra, por exemplo, a aquelas entidades deportivas con convenio municipal para o uso das instalacións municipais.
